Veldu hverfi til að senda inn hugmynd að verkefni

Stutt um Betri hverfi 2013

Betri hverfi 2013 er samráðsverkefni íbúa og stjórnsýslu Reykjavíkurborgar um smærri nýframkvæmdir og viðhaldsverkefni í hverfum Reykjavíkur. Verkefnið stendur allt árið 2013 og geta íbúar tekið þátt og fylgst með því á samráðsvefnum www.betrireykjavik.is, á íbúafundum, í verkefnahópum og á Facebook: http://www.facebook.com/Betri.Reykjavik

Hvað er fjármagnið mikið og hvernig skiptist það milli hverfa?

Fjármagn er alls 300 milljónir og skiptist á milli hverfa samkvæmt fastri fjárhæð og íbúafjölda. Sjá nánar...

Hvernig verkefni?

Um er að ræða verkefni til að bæta umhverfi og möguleika til útivistar og samveru, bæta aðstöðu eða tækifæri til leikja eða afþreyingar, hvetja til aukinna hjólreiða eða bæta aðstöðu og möguleika gangandi eða notenda strætó. Sjá nánar...

Hvað mega verkefnin kosta?

Verkefnin geta verið stór og smá en mega ekki kosta meira en það sem viðkomandi hverfi hefur til umráða. Starfsfólk borgarinnar mun meta framkvæmanleika og kostnað og leiðbeina um það. Sjá nánar...

Hvenær get ég sent hugmyndir inn?

Opið er fyrir innsendingu hugmynda í Betri hverfi frá 14. janúar til 15. febrúar 2013. Eftir að innsendingu lýkur verður hægt að rökstyðja hugmyndir frekar, ræða þær og gefa vægi – allt til 1. mars 2013. Sjá nánar...

Hvernig virkar samráðsvefurinn?

Þeir sem vilja setja inn hugmynd á vefinn verða að vera skráðir notendur Betri Reykjavíkur. Samráðið felst ekki síst í því að kynna sér hugmyndir annarra, ræða, bæta við eigin rökum og gefa þeim vægi. Sjá nánar...

Íbúafundir I og II – hvað er það?

Í hugmyndaferlinu er gert ráð fyrir tveimur íbúafundum í hverju hverfi, fyrst í tengslum við hverfafundi borgarstjóra um miðjan janúar 2013 og svo aftur í febrúar. Á fundunum er unnið með hugmyndir með það að markmiði að bjóða upp á 30 verkefni í hverju hverfi í rafrænni íbúakosningu í mars. Sjá nánar...

Verkefnahópar – hvað er það?

Á íbúafundi I verða 3 fulltrúar íbúa valdir í verkefnahópa. Hlutverk þeirra er að „fóstra“ hugmyndir hverfisins, þróa þær áfram í samvinnu við borgarstarfsmenn og hugmyndahöfunda og tryggja gott framboð og fjölbreytileika verkefna. Hverfisráð skipar einn fulltrúa í hópinn. Þjónustumiðstöð hverfis skipar hópnum starfsmann til að halda utan um starfið og tengslin við Umhverfis- og skipulagssvið. Sjá nánar...

Hverfisráð stillir hugmyndum upp

Að loknu mati Umhverfis- og skipulagssviðs og samtali þess við verkefnahóp og íbúa um þróun hugmynda, stillir hverfisráð hugmyndum að verkefnum upp til netkosningar. Sjá nánar...

Rafræn kosning

Kosið verður dagana 14. – 19. mars. Íbúar Reykjavíkur, 16 ára og eldri, geta kosið verkefni í hvaða hverfi sem er, óháð búsetu, en þó aðeins í einu hverfi. Niðurstaðan er bindandi og verður kynnt þann 20. mars. Sjá nánar...

Framkvæmd verkefna

Eftir 20. mars verða verkefnin úr rafrænu kosningunni hönnuð, boðin út og framkvæmd út árið 2013 í samráði við verkefnahópana og hverfaráðin. Sjá nánar...

Hvaða hugmyndafræði liggur að baki Betri hverfum?

Verkefnið byggir á hugmyndum um umræðulýðræði, þátttökulýðræði, þátttökufjárhagsáætlunargerð – að virkja almenning til þátttöku í lýðræðislegri umræðu og ákvarðanatöku, umfram það sem gerist í hefðbundnu fulltrúalýðræði. Verkefnið er frekari útfærsla á Betri hverfum 2012. Byggt er á reynslu fyrri ára en jafnframt leitað í smiðju sérfræðinga og annarra borga um heiminn þar sem þátttökufjárhagsáætlunargerð hefur verið reynd.

Skipting fjármagns eftir hverfum

Hvað er fjármagnið mikið og í hvernig verkefni fer það?

Í fjárhagsáætlun Reykjavíkurborgar fyrir árið 2013 er gert ráð fyrir 300 milljónum króna til verkefnisins. Fjármagn til þessara verkefna er aðeins hluti af því fé sem varið verður til framkvæmda í hverfunum á árinu.

Hvernig skiptist fjármagnið eftir verkefnum?

Fjármagn er eins og árið 2012 bundið við smærri nýframkvæmdir og viðhaldsverkefni. Í ljósi reynslunnar hefur nú til einföldunar verið gerð sú breyting að íbúar þurfa ekki að meta hvorum flokknum verkefnin tilheyra. Starfsmenn borgarinnar munu meta þetta í ferlinu og finna verkefnum kostnaðarstað.

Hvernig er fjármagninu skipt milli hverfa?

Til að tryggja minnstu hverfunum ákveðna lágmarksfjárhæð til umráða er hluta fjárheimildarinnar skipt jafnt milli hverfa. Það fjármagn sem eftir stendur skiptist á milli hverfanna í réttu hlutfalli við íbúafjölda.

Líkt og árið 2012 er fyrstu 75 milljónunum þannig skipt jafnt milli hverfanna tíu og koma því að lágmarki 7,5 milljónir króna í hlut hvers hverfis. Því sem eftir stendur, eða 225 milljónum króna, er skipt á milli þeirra 119.535 íbúa sem staðsettir eru í hverfum borgarinnar þannig að í hlut hvers og eins koma kr. 1.882,29. Þessi tala er svo margfölduð með íbúatölu hvers hverfis og fæst þá heildarfjárheimild hverfisins. Fjöldi íbúa og skipting milli hverfa miðast við 1. desember 2012.*

Betri hverfi 2013
Skipting fjármagns eftir hverfum						Skipting 2012

Hverfi	Íbúar	Lágmark	Skv. íbúafjölda	Samtals	Íbúar	Samtals
Árbær	10.483	7.500.000	19.732.046	27.232.046	10.313	27.068.092
Breiðholt	20.675	7.500.000	38.916.346	46.416.346	20.512	46.419.879
Grafarholt og Úlfarsárdalur	5.956	7.500.000	11.210.919	18.710.919	5.622	18.167.295
Grafarvogur	17.937	7.500.000	33.762.636	41.262.636	17.939	41.537.817
Háaleiti og Bústaðir	14.155	7.500.000	26.643.815	34.143.815	13.949	33.967.112
Hlíðar	9.704	7.500.000	18.265.742	25.765.742	9.650	25.810.103
Kjalarnes	812	7.500.000	1.528.419	9.028.419	836	9.086.243
Laugardalur	15.613	7.500.000	29.388.194	36.888.194	15.346	36.617.807
Miðborg	8.481	7.500.000	15.963.701	23.463.701	8.717	24.039.810
Vesturbær	15.719	7.500.000	29.587.717	37.087.717	15.696	37.281.904
Samtals:	119.535	75.000.000	224.998.951	299.998.951	118.580	299.996.062

* Tölurnar eru birtar með þeim fyrirvara að þær byggjast á nýjustu bráðabirgðatölum (10.01.2013) frá Velferðarsviði Reykjavíkurborgar. Endanlegar tölur frá Hagstofu Íslands munu væntanlega liggja fyrir í mars 2013 en búist er við mjög óverulegum breytingum.

Hvernig hugmyndir?

Þegar hugmynd er sett inn á samráðsvefinn www.betrireykjavik.is þarf fyrst að skrá sig á vefinn, velja hverfi og huga að því að heiti hennar og lýsing sé skýr.

Bæta umhverfi, útivistarmöguleik, aðstöðu til leikja, samgöngur gangandi og hjólandi

Þegar hugmynd er sett inn á Betri Reykjavík – Betri hverfi þarf hún að falla að eftirfarandi skilgreiningu:

Vera verkefni sem haft getur áhrif á umhverfi og eða möguleika til útivistar og samveru, til dæmis: Bekkir, aukinn trjágróður, dvalarsvæði, berjarunnar, útilistaverk, fegrunarverkefni, og fleira.

Vera verkefni sem haft getur áhrif á aðstöðu eða tækifæri til leikja eða afþreyingar, til dæmis: Bæta leiksvæði, endurnýja leiktæki, lagfæra sparkvelli, og fleira.

Vera verkefni sem hvetur til aukinna hjólreiða, bætir aðstöðu og eða möguleika gangandi eða notenda strætó, til dæmis: Stígtengingar, lýsing gönguleiða, lagfæring gönguslóða, og fleira.

Hugmyndin þarf líka að vera verkefni í verkahring borgarinnar, falla að skipulagi hennar og þarfnast ekki flókinna og/eða umfangsmikilla undirbúnings- og samráðsferla við aðrar stofnanir og aðila.

Hvað má hugmyndin kosta?

Þegar hugmynd er sett inn, á íbúafundi eða á samráðvef, er mikilvægt að reyna að gera sér grein fyrir kostnaðinum við framkvæmd hennar. Hugmynd má ekki kosta meira en það fjármagn sem hverfið hefur til umráða. Ekki verður kosið um hugmyndir sem fara framyfir þá upphæð. Starfsfólk borgarinnar mun meta og leiðbeina um kostnað.

Hvernig lýsi ég hugmyndinni?

Þegar ný hugmynd er sett inn, á íbúafundi eða samráðsvef, er mikilvægt að heiti hugmyndarinnar sé lýsandi og að hugmyndin sé vel vel útskýrð og rökstudd þannig að aðrir eigi auðvelt með að átta sig á hvað um er að ræða. Í hverju felst verkefnið? Hvað þarf að gera? Hvar á að framkvæma verkefnið?

Þessi atriði geta skipt miklu um hvort hugmyndin nær athygli annarra íbúa og fær það vægi sem til þarf til að um hana verði kosið á síðari stigum. Greinargóð lýsing á hugmyndinni getur jafnframt auðveldað starfsfólki borgarinnar að meta hana, s.s. kostnaðinn við framkvæmd hennar.

Yfirlit um ferill verkefnisins og tímasetningar

14. jan – 15. feb

14. – 29. jan

15. feb – 1. mar

11. – 26. feb

1. – 7. mars

14. – 19. mars

2013

Samráðsvefur

Íbúafundur I

Samráðsvefur

Íbúafundur II

Hverfaráð

Kosning

Framkvæmd

Íbúar setja inn hugmyndir, rökstyðja og ræða. Starfsmenn borgarinnar meta hugmyndir og leiðbeina

Íbúar vinna með hugmyndir undir leiðsögn. Valið í verkefnahópa sem vinna með hugmyndir í samvinnu við fagfólk fram til 1. mars

Lokað fyrir innsendingu en hægt að rökstyðja, ræða og gefa vægi.

Verkefnahópar kynna hugmyndir hverfisins og fá viðbrögð íbúa. Hverfisráð bæta eftir atvikum fleiri hugmyndum við.

Hugmyndir teknar af vef. Endanleg uppstilling allt að 30 verkefna í hverju hverfi

Íbúar kjósa rafrænt um verkefnin

Verkefni hönnuð, boðin út og framkvæmd

Ferill aðgerða og ákvörðunartöku – skref fyrir skref

14. jan. – 15. feb.

Samráðsvefur – Innsending hugmynda

Íbúar senda inn hugmyndir, rökstyðja, ræða og gefa vægi. Starfsmenn borgarinnar meta kostnað, umfang og framkvæmanleika og leiðbeina um það.

14. – 29. janúar

Íbúafundur I – hugmyndavinna og val í verkefnahópa

Fundaröð í tengslum við hverfafundi borgarstjóra. Íbúar setja fram hugmyndir, vinna með þær í hópum sem njóta leiðsagnar fulltrúa frá Umhverfis- og skipulagssviði. Einnig verða þrír fulltrúar íbúa valdir í verkefnahóp hverfis til að fóstra hugmyndir hverfisins.

Tímasetningar fundanna eru sem hér segir:

Laugardalur	mánudagur 14. janúar kl. 17.00 í Laugalækjarskóla
Árbær	miðvikudagur 16. janúar kl. 17.00 í Árbæjarskóla
Vesturbær	fimmtudagur 17. janúar kl. 17.00 í Hagaskóla

Háaleiti og Bústaðir	mánudagur 21. janúar kl. 17.00 í Réttarholtsskóla
Breiðholt	þriðjudagur 22. janúar kl. 17.00 í Gerðubergi
Miðborg	miðvikudagur 23. janúar kl. 17.00 í Ráðhúsi Reykjavíkur
Grafarholt/Úlfarsárdalur	fimmtudagur 24. janúar kl. 17.00 í Sæmundarskóla
Kjalarnes	fimmtudagur 24. janúar kl. 20.00 í Klébergsskóla

Hlíðar	mánudagur 28. janúar kl. 17.00 á Kjarvalsstöðum
Grafarvogur	þriðjudagur 29. janúar kl. 17.00 í Gufunesbæ

15. febrúar – 1. mars

Samráðsvefur – þroskun hugmynda

Lokað er fyrir innsendingu en áfram hægt að rökstyðja, ræða og gefa vægi til 1. mars.

11. – 26. febrúar

Íbúafundur II

Verkefnahópar kynna hugmyndir og fá viðbrögð íbúa. Hverfisráð geta bætt við hugmyndum til að tryggja fjölda, fjölbreytileika og jafna dreifingu.

11. febrúar – 5. mars

Eftirvinnsla verkefna og vinnsla kynningarefnis

Verkefnahópar ljúka í samvinnu við Umhverfis- og skipulagssvið útfærslu innkominna verkefna sem mæta kröfum um framkvæmanleika og kostnað.

1. – 7. mars

Uppstilling hverfaráða

Hugmyndir teknar af samráðsvef 1. mars og afhentar hverfaráðum í þeirri röð sem íbúar hafa gefið þeim. Hverfaráð stilla verkefnum upp.

14. – 19. mars

Rafræn íbúakosning á netinu

Endanleg forgangsröðun verkefna. Úrslit verða tilkynnt 20. mars.

20. mars – desember

Hönnun, útboð og framkvæmd verkefna

Umhverfis- og framkvæmdasvið vinnur að hönnun og útboði verkefna í samráði við verkefnahópa íbúa og hverfisráðs. Reglulega verður upplýst um gang mála.

Frá hugmynd til framkvæmda – hver gerir hvað?

Samráðsvefurinn – íbúar setja inn hugmyndir

Þeir sem vilja setja inn hugmynd á vefinn verða að vera skráðir notendur Betri Reykjavíkur. Opið er fyrir innsendingu hugmynda til 15. febrúar en þá geta íbúar áfram rökstutt hugmyndir, rætt þær og gefið vægi til 1. mars. Öllum stendur til boða að nota almenningstölvur í bókasöfnum og þjónustumiðstöðvum borgarinnar í þessu skyni. Samráðið felst ekki síst í því að íbúar kynni sér hugmyndir annarra, ræði þær, bæti jafnvel við eigin rökum og gefi þeim vægi sitt (hér gilda sömu reglur og á Betri Reykjavík). Allar hugmyndir og rökstuðningur úr ferlinu eru sett á samráðsvefinn til umræðu.

Við stofnun nýrrar hugmyndar þarf að velja henni hverfi. Hægt er að setja inn hugmynd í hvaða hverfi borgarinnar sem er, óháð búsetu. Með sama hætti er hægt að bæta við rökum við hugmynd eða gefa henni vægi sitt. Mikilvægt er að hafa í huga þegar hugmynd er sett inn, að hún kosti ekki meira en það fjármagn sem hvert hverfi hefur til umráða. Einnig að hún falli að þeirri lýsingu og skilmálum verkefna sem borgin er að óska eftir. Verkefni sem verða kostnaðarmetin hærri en það fjármagn sem hverfi hefur, svo og ef þau falla ekki að skipulagi, hlutverki eða stefnu borgarinnar, mun ekki verða kosið um.

Íbúafundur I

Íbúafundur I er fundur íbúa í hverju 10 hverfa Reykjavíkurborgar í tengslum við hverfafundi borgarstjóra í janúar 2013. Hlutverk íbúafundar er í grófum dráttum þríþætt:

að setja fram hugmyndir að verkefnum um Betri hverfi 2013
að vinna með og þróa áfram hugmyndirnar í samtali við starfsfólk Umhverfis- og skipulagssviðs
að velja þrjá áhugasama íbúa til setu í verkefnahóp hverfisins

Hlutverk íbúafundarins er að laða fram og þróa góðar og raunhæfar hugmyndir að verkefnum í hverfinu þannig að íbúar geti fyrst forgangsraðað þeim og fjallað um þær á samráðsvefnum og svo valið úr þeim 30 vinsælustu við rafræna kosningu í mars. Þær hugmyndir sem eftir standa að fundi loknum eru settar inn á samráðsvefinn í nafni fundarins. Íbúum er frjálst að taka upp þær hugmyndir sem detta út í meðförum hópanna, vinna áfram með þær og setja á samráðsvefinn í eigin nafni. Hverfisráði er einnig heimilt að nota þessar hugmyndir síðar í ferlinu.

Hugmyndavinnan fer þannig fram að fundargestir vinna í litlum hópum undir stjórn fundarstjóra. Íbúar setja fram og þróa hugmyndir og njóta til þess leiðsagnar fulltrúa Umhverfis- og skipulagssviðs varðandi framkvæmanleika og kostnað.

Á fundinum geta íbúar einnig boðið sig fram í verkefnahóp hverfisins með því að setja nafn sitt í hatt. Valið er í hópinn þannig að nöfn áhugasamra eru dregin úr hattinum þar til hópurinn er fullskipaður. Séu fulltrúarnir þrír allir af sama kyni er haldið áfram að draga nöfn úr hattinum þar til fulltrúi af hinu kyninu er dreginn og mun hann skipa sæti í hópnum í stað þess fulltrúa sem síðast valdist inn í hópinn.

Verkefnahópur – fulltrúar íbúa og hverfisráðs

Á Íbúafundi I eru þrír áhugasamir fulltrúar íbúa valdir í verkefnahóp hverfisins. Tilgangurinn með verkefnahópnum er að bæta aðkomu íbúanna að hugmyndaferlinu og reyna að tryggja betur eignarhald þeirra á verkefnunum. Auk þessara þriggja fulltrúa íbúa skipar hverfisráð einn fulltrúa í hópinn. Þá skipar þjónustumiðstöð hverfisins einn starfsmann fyrir hópinn til að halda utan um starf hans og tryggja tengslin við Umhverfis- og skipulagssvið. Náist ekki að fylla sæti íbúa í hópnum á fyrri íbúafundi skipar hverfisráð fulltrúa í hann.

Hlutverk hópsins er að fóstra allar hugmyndir hverfisins með það að markmiði að hægt verði að bjóða upp á 30 verkefni í hverfinu við kosninguna í mars. Hópurinn hefur frumkvæði að því að vekja athygli á verkefninu og virkja íbúa með því að kalla eftir og þróa áfram hugmyndir í samvinnu við höfunda þeirra og fulltrúa Umhverfis- og skipulagssviðs sem meta kostnað og framkvæmanleika. Hópurinn skal ávallt hafa í huga sjónarmið um jafna dreifingu um hverfið og fjölbreytileika hugmynda. Að kosningu lokinni hefur hópurinn það hlutverk að fylgjast með afdrifum verkefna og vera Umhverfis- og skipulagssviði til samráðs varðandi framkvæmd þeirra.

Til að sinna hlutverki sínu er gert ráð fyrir að hópurinn sé virkur á samráðsvefnum, m.a. til að laða fram frekari skýringar og rökstuðning fyrir hugmyndum, og reyni að virkja íbúa hverfisins til þátttöku. Enn fremur er gert ráð fyrir að hópurinn geti verið í beinum samskiptum við borgarstarfsmenn á verkefnisvef hverfisins. Að öðru leyti kemur hópurinn sér sjálfur saman um vinnulag, t.d. fundi til að fara yfir hugmyndir o.s.frv.

Íbúafundur II – hugmyndir kynntar og hverfisráð bætir við ef þarf

Á seinni íbúafundinum, mánuði eftir þann fyrri, kynnir verkefnahópur hugmyndirnar og gefst þá íbúum kostur á að koma með athugasemdir. Á þessum fundi gefst hverfisráði kostur á að bæta við allt að 6 hugmyndum hafi markinu um 30 framkvæmanlegar hugmyndir enn ekki verið náð. Hafi markinu verið náð en sýnt er að hugmyndir endurspegli ekki allt hverfið getur hverfisráðið bætt við allt að 6 hugmyndum. Hugmyndir hverfisráðs þurfa að uppfylla sömu skilyrði og aðrar innsendar hugmyndir. Markmiðið er að eftir báða íbúafundina séu a.m.k. 30 hugmyndir komnar í pottinn sem endurspegli sem best allt hverfið.

Eftir fundinn hafa verkefnahópar um viku til að ganga frá innkomnum hugmyndum í samvinnu við Umhverfis- og skipulagssvið en áfram er hægt að ræða þær og gefa vægi á samráðsvef til 1. mars.

Áætlaðar tímasetningar fundanna eru sem hér segir (sett fram með fyrirvara um breytingar):

	Laugardalur	mánudagur 11. febrúar kl. 17.00
	Árbær	miðvikudagur 13. febrúar kl. 17.00
	Vesturbær	fimmtudagur 14. febrúar kl. 17.00

	Háaleiti og Bústaðir	mánudagur 18. febrúar kl. 17.00
	Breiðholt	þriðjudagur 19. febrúar kl. 17.00
	Miðborg	miðvikudagur 20. febrúar kl. 17.00
	Grafarholt/Úlfarsárdalur	fimmtudagur 21. febrúar kl. 17.00
	Kjalarnes	fimmtudagur 21. febrúar kl. 20.00

	Hlíðar	mánudagur 25. febrúar kl. 17.00
	Grafarvogur	þriðjudagur 26. febrúar kl. 17.00

Umhverfis- og skipulagssvið – mat á kostnaði og framkvæmanleika

Frá og með 14. janúar fær starfsfólk umhverfis- og skipulagssviðs fyrstu hugmyndir íbúa til vinnslu. Í því felst að hugmyndirnar eru metnar út frá kostnaði og framkvæmanleika, s.s. hvort þær séu í verkahring borgarinnar og falli að skipulagi hennar. Þær hugmyndir sem eru óframkvæmanlegar eða sprengja fjárhagsramma hverfisins, og sem ekki næst með góðu móti að meta og aðlaga kröfunum í samtali Umhverfis- og skipulagssviðs og verkefnahóps fyrir byrjun mars, detta sjálfkrafa út og koma ekki til kosningar.

Hugmyndirnar geta orðið færri en 30 fyrir hvert hverfi ef ekki hafa borist nógu margar hugmyndir í öllu ferlinu og/eða ef ekki hefur tekist að fella þær að þeim skilgreiningum um hugmyndir sem hér er kallað eftir. Vegna álags getur þurft að takmarka þann fjölda hugmynda sem Umhverfis- og skipulagssvið metur fyrir hvert hverfi og miðast hann við 36 hugmyndir.

Hverfisráð stillir verkefnum upp

Í byrjun mars, að lokinni síðustu yfirferð Umhverfis- og skipulagssviðs í samtali þess við verkefnahóp og íbúa um þróun hugmynda, sendir verkefnahópur hverfisráði verkefni til uppstillingar í þeirri röð sem þau koma af samráðsvefnum. Hverfisráð fer yfir verkefnin m.a. með hliðsjón til dreifingar þeirra um hverfið. Sé það mat hverfisráðsins að röðun þeirra verkefna sem koma eiga til kosningar (allt að 30) endurspegli ekki jafna dreifingu verkefna um hverfið getur ráðið nú skipt allt að 6 verkefnum út fyrir verkefni neðar á listanum. Ráðið skal við þetta hafa í huga vinsældir þeirra hugmynda sem skipt er út. Miðað er við að niðurstaða hverfisráðanna liggi fyrir ekki síðar en á bilinu 1. – 7. mars.

Bindandi kosning um verkefni

Íbúar Reykjavíkurborgar geta kosið um þau allt að 30 verkefni sem hverfaráðin hafa stillt upp fyrir hvert hverfi. Kosið verður í gegnum rafrænt kosningakerfi á sérstökum kosningavef þar sem notandi auðkennir sig með öruggum hætti og þar sem atkvæði er dulkóðað. Þannig er aldrei hægt að tengja atkvæði við kjósanda. Heimild til að kjósa hafa þeir sem eru 16 ára og eldri 31. desember 2012 og hafa lögheimili í Reykjavík þegar kosning fer fram. Kjósandi getur sjálfur valið það hverfi sem hann vill, en aðeins er hægt að kjósa verkefni í einu hverfi.

Kosning hefst á miðnætti fimmtudaginn 14. mars og lýkur formlega í lok þriðjudagsins 19. mars. Kosningin verður opin til kl. 04.00 aðfaranótt 20. mars. Hægt er að kjósa hvenær sem er á þessu tímabili. Gerð er grein fyrir kostnaði við hvert verkefni og því geta kjósendur valið þann fjölda verkefna sem þeir vilja þar til þeirri heildarupphæð er náð sem hverfið hefur til umráða. Hægt er að kjósa oftar en einu sinni, t.d. ef kjósandi hefur skipt um skoðun, en aðeins síðasta kosningin er gild.

Kosningin felur í sér endanlega ákvörðun um val verkefna og verða niðurstöður hennar kynntar þann 20. mars. Innri endurskoðun Reykjavíkurborgar hefur eftirlit með því að skráðum ferlum kosningarinnar sé fylgt til hlítar.

Nánari upplýsingar um kosningakerfið, uppbyggingu þess og öryggi verða aðgengilegar þegar nær dregur kosningu. Auðkenning hvers kjósanda er örugg og er um að ræða auðkenni sem þegar eru í notkun og hafa verið prófuð og tekin út. Nánari leiðbeiningar um auðkenni og hvernig þau eru notuð til þess að taka þátt í kosningunni verða aðgengilegar þegar kosning hefst.

Framkvæmd verkefna

Verkefnin verða hönnuð, boðin út og framkvæmd á árinu 2013 og verður reglulega upplýst um gang mála. Haft verður samráð við verkefnahópa og hverifsráð um framkvæmdir – ekki síst í tilfellum ófyrirséðra og óhjákvæmilegra breytinga.

Upplýsingar um hugmyndir, verkefni og framkvæmdir

Reykjavíkurborg mun á samráðsvefnum Betri Reykjavík, á Facebooksíðu Betri Reykjavíkur og eftir atkvikum öðrum miðlum sínum, gera grein fyrir afgreiðslu og afdrifum þeirra hugmynda sem berast inn í Betri hverfi 2013.

Hvað ef ég vil eða get ekki notað samráðsvefinn?

Þeir sem ekki vilja setja fram hugmyndir á samráðsvef eða íbúafundi geta til 15. febrúar sent hugmyndir sínar á betrireykjavik@ibuar.is eða með pósti til viðkomandi þjónustumiðstöðvar, merkt hverfisráði. Lýsing á hugmyndinni þarf að öðru leyti að vera í samræmi við þau skilyrði sem sett eru um Betri hverfi 2013. Hverfisráð getur notað hugmyndir sem berast með þessum hætti og ákveðið hvort þær verði einhverjar þeirra hugmynda sem það hugsanlega notar á síðari íbúafundi.

Þeir sem ekki geta sett fram hugmyndir á samráðsvef eða íbúafundi, s.s. vegna fötlunar, býðst að nota sömu innsendingarmöguleika og að ofan greinir. Starfsmenn Reykjavíkurborgar miðla þessum hugmyndum á vefinn.

Sett á samráðsvefinn Betri Reykjavík – Betri hverfi þann 14. janúar 2013

Skrifstofa borgarstjóra og borgarritara