Betri aðgangur gangandi og hjólandi yfir á Fiskislóð

Betri aðgangur gangandi og hjólandi yfir á Fiskislóð tengir íbúðahverfi vestast í Vesturbæ við þjónustu og verslanir á Fiskislóð og Hólmaslóð. Nú er frágangur hringtorgs þannig að gangandi fólk á í vanda með að komast yfir Mýrargötu og Ánanaust. Það léttir á umferðaræðum þarna ef hægt er að auka aðra umferð en bílaumferð, og meira líf færist yfir hverfið. Fyrst nærþjónustan vildi fara út á hafnarsvæðið og út að Örfirisey, er rétt að gangbrautirnar fylgi þangað líka.

Sammála - hvað þá með blessað eldra fólkið sem þarf að staulast með göngugrindina yfir illa frágengið svæðið og bílar á blússandi ferð - bara tímaspursmál hvenær slys verður. Fyrst gamla fólkið getur ekki lengi verslað í hverfisbúðinni eins og það gerði þar til fyrir um 10-20 árum (takk "þróun"), þá a.m.k. mætti gera trist verslunarferðir út á Granda minna lífshættulegar...

einmitt - er búin að vera þarna mikið á ferðinni með barnavagn og innkaupapoka, maður þarf að hafa sig allan við.

Alveg nauðsynlegt. Við fjölskyldan eigum í mestu vandræðum með að komast leiða okkar og bílar stoppa sjaldan fyrir gangandi vegfarendum, hvort sem það er við hringtorgið eða þegar reynt er að komast yfir á gatnamótum Seljavegar og Mýrargötu (við apótekið). Ég horfði nýlega út um gluggann á 10 ára son minn standa og bíða og bíða meðan hver bíllinn á fætur öðrum brunaði fram hjá honum án þess að stoppa. Þetta verður að laga.